હજી સુધી

بِسْمِ اللّٰهِ الرَّحْمٰنِ الرَّحِيْمِ 

આવે છે યાદ ખુમનો એ અવસર હજી સુધી,

ઝંખે એ દ્રશ્ય જોવા દિવાકર હજી સુધી.

હૈદરના મદહખ્વાન કદી કમ નહીં થશે,

છલકી રહ્યા છે મદહના સાગર હજી સુધી.

ઇન્કાર મૂર્તઝાની વિલાયતનો જે કરે,

ઉતરે છે એના મસ્તકે પથ્થર હજી સુધી.

પામ્યા નજાત શાહના ખોળામાં એટલે,

હુર પર કરે છે ગર્વ મુકદ્દર હજી સુધી.

મેરાજી મરતબો તો ફક્ત મુસ્તફાનો છે,

પામી શક્યા ન કોઈ પયમ્બર હજી સુધી.

આલે નબીના ઘ્વારને છોડીને જે ગયા,

દર દરની ખાતા જાય તે ઠોકર હજી સુધી.

અબતર નબીને કહેનારા કુરઆન પઢ જરા,

આપે પુરાવો સુરએ કૌસર હજી સુધી.

બદલાશે કોઈ દિ નહીં બદલાયું પણ નથી,

છે ઇલ્મના શહેરનું અલી દર હજી સુધી.

રોજે અજલથી હું તો અલીનો ગુલામ છું,

આપે સદા એ મસ્ત કલંદર હજી સુધી.

ખુલ્લા ખુદાની જેમ આ ગાઝીના હાથ છે,

પામે છે સૌ મુરાદ ગદાગર હજી સુધી.

કરબોબલા એ હો કે મહોર્રમના તાજીયા,

પહેરો ભરે છે શેહનો દિલાવર હજી સુધી.

અકબરની એ અઝાનનો બેશક કમાલ છે,

સુરત રહી નમાઝની સુંદર હજી સુધી.

 સુઘરાનો એ સવાલ સતાવે છે રાત દિન,

આવ્યા ન લેવા કેમ બિરાદર હજી સુધી.

બહેલોલ જેમ વેચે બનાવીને જન્નતો,

એવો ન જોયો કોઈ કલાધર હજી સુધી.

હુરનો પ્રથમ સબક હજી સમજી નથી શક્યો,

કરબોબલાનું ચાલે છે ભણતર હજી સુધી.

બોત્તેરનો કરમ છે કે આવી ન પાનખર,

દીને ખુદાના પાક ચમન પર હજી સુધી.

તારા મઝારનો છે તને વાસતો હુસૈન,

તારો "કલીમ" જીવે છે બેઘર હજી સુધી.

મોમિન ખાદિમહુસૈન "કલીમ"- વલેટવા

તાહામાં હુસૈન

بِسْمِ اللّٰهِ الرَّحْمٰنِ الرَّحِيْمِ

હલઅતા ને ઇન્નમા યાસીન તાહામાં હુસૈન,

ઝીક્ર તારો પણ મળે પ્રત્યેક સૂરામાં હુસૈન.

દુન્યવી ધનવાનના રણકાર સૌ ફિક્કા પડે,

આવે છે તૌહીદી રણકો તારા સિક્કામાં હુસૈન.

દિલ તો કાબા છે મગર એક વાત આ પણ સત્ય છે,

હર ઘડી હાજર રહે છે મારા હૈયામાં હુસૈન.

જ્હોન,હુર, વાહબને  જે રીતે તેં આપી'તી નજાત,

અમને પણ તારી જજે તું તારી નૌકામાં હુસૈન

ઓલવી બોત્તેર દિવા, દીન તેં રોશન કર્યો,

છે અજબ કારીગરી અજવાસ કરવામાં હુસૈન.

મૌતનું ચક્કર પછી એને ભલા શું મારશે,

હુર બની આવી ગયો જે તારા કિલ્લામાં હુસૈન.

તોય આંખોની અટારી પરથી આંસુ નીતરે,

નામ  લઉં તારું જો હું ખુશીઓના મૌકામાં હુસૈન.

તું પ્રથમ બોલે પછી કિસ્મત બધી લેખાય છે,

હક છે એ લૌહો કલમ છે તારા કબજામાં હુસૈન.

ઋણ ચૂકવી ના શકે કોઇ આખરી સજદા સુધી,

જોર કઈ એવું હતું એક તારા સજદામાં હુસૈન.

લાખના લશ્કરને પળમાં મેળવી દે ખાકમાં,

એટલી હિંમત હતી એક તારા સક્કામાં હુસૈન.

તારા કહેવાથી દુઆ પર દસ્તખત થઈ જાય છે,

થાય ખુદ રાજી ખુદા આમીન કહેવામાં હુસૈન.

નામ લઉં શબ્બીરનું તો સાદ આવે "એહમદી",

ને મોહંમદ બોલું તો સંભળાય પડઘામાં "હુસૈન"

તેં હબીબને જે રીતે કાગળ લખી આપ્યું ઇજન,

એ રીતે દે જે નિમંત્રણ તારા ખયમાંમાં હુસૈન.

ભીખ પામું તારા ઘરની એ જમાનો આપજે,

હુંય સાઈલ થઈને આવું તારા ફળિયામાં હુસૈન.

કરબલામાં જે ઘડી તેં ખૂન અસગરનું લીધું,

વિશ્વની રોજી હતી એક તારા ખોબામાં હુસૈન.

હુરની જેમજ જઈ રહ્યા'તા કુફ્રના અંધારમાં,

શુક્ર છે અમને મળ્યા કાશીના રસ્તામાં હુસૈન.

છે તડપ તારા મિલનની કે બળીને ખાક થઉં,

જે મજા આવે છે પરવાનાને બળવામાં હુસૈન.

જે લખાયું છે, ફક્ત એ છે કિનારા પરની વાત,

કોઈ નહીં પોહચે ફઝીલતના એ દરિયામાં હુસૈન.

વાસ્તો આપું છું તારા પારણાનો પ્યારથી,

લાવલદના ઘેર બાળક ઝૂલે ઝુલામાં હુસૈન.

સૌ જગત પરની કલમ લેખી શકે તારી સના,

એટલી સ્યાહી નથી દુનિયાના દરિયામાં હુસૈન.

તોય ના સંપૂર્ણ થઈ તારી ફઝીલતની કથા,

કેટલી સદીઓ વીતી ગઈ તારી ચર્ચામાં હુસૈન.

મૌત તક મારી કલમ તારી સના કરતી રહે,

ફિક્ર તું બસ પૂરતો રહેજે દિલના ખડીયામાં હુસૈન.

ખાદિમહુસૈન "કલીમ" મોમિન. વલેટવા.