ઝહરા

بِسْمِ اللّٰهِ الرَّحْمٰنِ الرَّحِيْمِ

આ ફઝીલત ન કોઈની છે ખરેખર ઝહરા,

આપ છો આપ ફકત બાપની માદર ઝહરા.

 

વાસ્તો આપને શબ્બીરના ઝૂલાનો છે

ફિક્રને મારી નવા આપી દો શેહપર ઝહરા

 

મહેફિલે આવી મલક બેઠા છે મદહોશ બની,

આપની મદ્હનું છાંટયું જો મેં અત્તર ઝહરા.

 

હશ્રના તાપમાં બસ છાંયડો દેજો મુજને

હું નથી માંગતો બીજું કશું વળતર ઝહરા.

 

દિલ મહીં આપના શૌહરની વિલાયત છે તો,

દીન-દુનિયામાં અનોખો છું તવંગર ઝહરા.

 

આપ મેહરાબે ઇબાદતમાં ઉભા થાએ તો,

રોશની ફેલે મદીનાના ઘરે ઘર ઝહરા

 

સાતસો વર્ષોથી એક નૂર મળે છે અમને

આપની આલથી જે મેળવ્યા રહબર ઝહરા.

 

આવીને આંગણું સલમાનની માફક વાળું,

હાજરી મારી કરો આપના દર પર ઝહરા.

 

બેજુબાન આપના બેશીરની એ બરકત છે,

હા ભરેલા છે અનાજોથી જે ખેતર ઝહરા.

 

હશ્રમાં આટલું કાફી છે શફાઅત માટે

આ "કલીમ" આપના ઘરનો છે સનાગર ઝહરા

ના'ત લખીએ

 

بِسْمِ اللّٰهِ الرَّحْمٰنِ الرَّحِيْمِ

હબીબે કિબ્રિયાની વાત લખીએ

ચલો ભેગા મળીને ના'ત લખીએ

 

ગણાશે મુસ્તફાની મદ્હમાં એ

ચલો કુરઆનની આયાત લખીએ

 

 જીવે આ કોમ પણ સીરત નબીની,

કહ્યું પીરે ચલો દીનિયાત લખીએ.

 

 નબીના 'ઉમ્મી' હોવાને જે સમજ્યો

બસ એવા શખ્સને નિષ્ણાત લખીએ

 

જો કહીએ ચાંદ એના શુભ વદનને

તો એની ઝુલ્ફને મધરાત* લખીએ.

 

 મોહંમદના પિસરનું મન છે રાહિબ!

તો લે તારા ય દીકરા સાત લખીએ

 

કહે છે જે કોઈ અહેમદને અબતર

એ મુજરિમ પર ખુદાની ઘાત લખીએ

 

મોહંમદની આ દીકરીને શું લખીએ?

કહો, અલ્લાહની સોગાત લખીએ

 

અને ભાઈને એના શું લખીશું?

ચલો અલ્લાહની તાકાત લખીએ

 

એ મૌખિક એને અબ્તર કહેશે, એની

અમે કુરઆનમાં ઔકાત લખીએ

 

મોહંમદ મુસ્તફાથી લઈને ફાઇઝ

મદીનાથી લઈ ગુજરાત લખીએ

 

હૃદયપૃષ્ઠે સ્મરણ અહેમદનું રાખી

વલીએ અસ્ર કેરી ઝાત લખીએ

 

હરેક દુશ્મન નબીનો થરથરે છે

અલીની જંગની જ્યાં વાત લખીએ

 

 ફઝીલતની પરાકાષ્ઠાની વાતો

નબીના નામની પશ્ચાત લખીએ

 

 નબીના ધૈર્યનું વર્ણન છે મક્સદ

જો લખીએ તો પછી ઉત્પાત લખીએ

 

મોહંમદ નુરે અવ્વલ છે પછી તો

ચલો શરૂઆતની શરૂઆત લખીએ

 

ખુલાસો લો હું "તબ્બત"નો કરી દઉં

લહબના બાપને કમજાત લખીએ.

 

કલીમ-અતા-અલીફ-અકીબ

સલ્લલ્લાહો અલયહે વસલ્લમ

بِسْمِ اللّٰهِ الرَّحْمٰنِ الرَّحِيْمِ

નાત લખું અય ખાલીકે અકબર,સલ્લલ્લાહો અલયહે વસલ્લમ

મૌલા કર ઇલ્હામની ઝરમર,સલ્લલ્લાહો અલયહે વસલ્લમ.

 

કુદરત રબની નાત પઢે છે, હૂરો મલક સલવાત પઢે છે,

બોલે સૌ સહેરા ને સમંદર, સલ્લલ્લાહો અલયહે વસલ્લમ.

 

કુદરત એના કબજામાં છે,એની કરામતનું શુ કહેવું?

કલમો પઢે છે હાથમાં કંકર, સલ્લલ્લાહો અલયહે વસલ્લમ.

 

જોઈ લો એના એક ઈશારે,ચાંદ બે ટુકડા થઈને આવે,

આકાશેથી આવે ધરા પર, સલ્લલ્લાહો અલયહે વસલ્લમ.

 

અબતર કહેનારા અય અબતર, પઢ તું જરા કુરઆનના અક્ષર,

    ઇન્ના આઅતયના કલ કૌસર, સલ્લલ્લાહો અલયહે વસલ્લમ. 

રસૂલે અકરમનો

 

بِسْمِ اللّٰهِ الرَّحْمٰنِ الرَّحِيْمِ

ઇસ્લામને જીવન આપે છે ઉપકાર રસૂલે અકરમનો,

સંસારને માટે વાજીબ છે આધાર રસૂલે અકરમનો.

 

જીબ્રિલ, અબુઝર બેઠા છે,સલમાન, બિલાલ મુઅજજીન છે,

ભરપૂર છે શાનો શૌક્તથી દરબાર રસૂલે અકરમનો.

 

શબ્બીરનું એમાં રક્ત ભળ્યું,હરીયાળી હસનથી છે કાયમ,

ઝહરાને અલીથી ખીલ્યો છે ગુલઝાર રસૂલે અકરમનો.

 

બે નૂરના એણે ભાગ કર્યા,ને ખુદના ચીતર્યા,

એના રંગથી અલ્લાહે કીધો શણગાર રસૂલે અકરમનો.

 

અખલાક ને જોહદ તકવાના જે જામને પી તરબોળ રહ્યો,

કૌસરના કિનારે પહોંચી જશે મયખ્વાર રસૂલે અકરમનો

 

દીદાર ખુદાના થઇ જાએ, મેઅરાજને પામી લે બેશક,

જીવનમાં ઉતારે જે મોમિન કિરદાર રસૂલે અકરમનો

સના મુસ્તફાની

 

بِسْمِ اللّٰهِ الرَّحْمٰنِ الرَّحِيْمِ

મળે ના કોઈ વિશ્વમાં જેનો સાની, ખુદા બાદ સઘળી સના મુસ્તફાની,

જે સર્વે જગત પર છે રહમત ખુદાની, ખુદા બાદ સઘળી સના મુસ્તફાની.

 

મુઝમ્મિલ, મુદસ્સિર ને યાસીન તાહા, ખુદાએ અનોખા લકબથી નવાજ્યા,

ન એના સમો કોઈ દુનિયામાં જ્ઞાની, ખુદા બાદ સઘળી સના મુસ્તફાની.

 

સવા લાખ નબીઓ ન પામી શક્યા જે, ખુદાના તરફથી એ રુત્બા મળ્યા છે,

સફર જેણે કીધી હતી આસમાની, ખુદા બાદ સઘળી સના મુસ્તફાની.

 

વહીના વગર જે કદી પણ ન બોલે,  રહસ્યો શરીઅત, તરીકતના ખોલે,

છે આદમથી પહેલાની એની કહાની, ખુદા બાદ સઘળી સના મુસ્તફાની.

 

કદી પત્થરો એના ચરણોને ચૂમે, કદી કાંકરા એનો કલમો પઢી લે,

નવાઈ નથી એના કઈં મોઅજિઝાની, ખુદા બાદ સઘળી સના મુસ્તફાની.

 

બધા સર્જનો, ચાંદ, તારા, નજારા, ગગન, જંગલો ને ધરા, મેઘ ધારા,

ખુદાની મોહબ્બતની છે આ નિશાની, ખુદા બાદ સઘળી સના મુસ્તફાની.

 

નબીની પથારી ઉપર સોડ તાણી, સવારે ખુલી એવી આંખો મીંચાણી

અલીને મજા આવી ગઈ ઊંઘવાની, ખુદા બાદ સઘળી સના મુસ્તફાની.

 

મોહંમદનો આશિક, મને શેની ચિંતા? કલીમે કરી દીધી એની વ્યવસ્થા,

શફાઅતમાં આ નાત આગળ થવાની, ખુદા બાદ સઘળી સના મુસ્તફાની.

મઝ્લૂમની મહેનત ઝિંદાબાદ

 

بِسْمِ اللهِ الرَّحْمٰنِ الرَّحِيْمِ

 

મઝ્લૂમની મહેનત ઝિંદાબાદ, સરવરની શહાદત ઝિંદાબાદ

ઇસ્લામ છે રોશન જેનાથી, એ શમ્મે હિદાયત ઝિંદાબાદ.

(1)

ના જુલ્મ સિતમ કરવા માટે, ના તાજ હુકૂમત ધરવાને

ના માલ મતાની લાલચમાં, ના જંગ કોઈ પણ લડવાને

શબ્બીર મદીનાથી નીકળ્યા ઉમ્મતનો સુધારો કરવાને.

ઇસ્લામને માટે કરબલમાં, સરવરની કયાદત ઝિંદાબાદ

(2)

હક રાહ ઉપર ઘરબાર ધરે, કુરબાન કરે સઘળા ઘરને,

અક્બરની જવાની આપી દે, કુરબાન કરે તું અસ્ગરને

હક માટે ફિદા થઈ જાય અને હક માટે લૂંટાવે જીવતરને,

આ સબ્ર છે તારી અય મૌલા, આ સબ્ર ને હિંમત ઝિંદાબાદ.

(3)

ના ભાઈ રહ્યા,અસ્હાબ નથી, છે જુલ્મના ઘેરામાં સરવર

છે અસ્રના સજ્દામાં માથું, ને શિમ્રનું ગરદન પર ખંજર,

ઉમ્મતને દુઆઓ આપે છે, ના કોઈ શિકાયત છે લબ પર

આ કામ ફકત તારાથી થયું, છે તારી સખાવત ઝિંદાબાદ.

(4)

શબ્બીરને પ્યાસા કત્લ કરી, જાલિમને હતું કે જીત થઈ

બોત્તેર સિપાહી જીવે છે, બાતિલનું જગતમાં નામ નથી,

હક કાયમ છે, હક રોશન છે દુનિયાએ હકીકત જોઈ લીધી

છે ચૌદસો વર્ષોથી કાયમ, માઅસૂમ ઇમામત ઝિંદાબાદ 

(5)

જાલિમનો હતો મક્સદ એક જ ઇસ્લામ રહે ના દુનિયામાં

અહમદનું એની આલનું પણ કોઈ નામ રહે ના દુનિયામાં

હક બાકી રહે ના હકવાળો પૈગામ રહે ના દુનિયામાં

શબ્બીરની મહેનતથી કિન્તુ છે દીન સલામત ઝિંદાબાદ

(6)

તું લાખનું લશ્કર લઈ આવે, હકવાળો ડરી શકશે ન કદી

તું કરશે પ્રયત્નો લાખ છતાં શબ્બીર મરી શકશે ન કદી

છે નૂર ખુદાનું અય જાલિમ તું કત્લ કરી શકશે ન કદી

નેઝાની અણી પર જોઈ લે તું છે શેહની તિલાવત ઝિંદાબાદ.

(7)

આ ફર્શે અઝા માતમદારી હલ્મિનની સદાનો ઉત્તર છે

મઝ્લૂમનો ગમ છે હર દિલમાં ને આંખમાં અશ્રુ સાગર છે

મઝ્લૂમનો હર એક હામી છે મઝ્લૂમના આશિક ઘર ઘર છે.

હર કોમ પુકારે છે એને, હર કોમની ઉલ્ફત ઝિંદાબાદ.

(8)

કરબલ છે મોહબ્બતનું મક્તબ, માનવતાનો મદ્રેસો છે,

ને સત્ય અહિંસા, ધીરજના, અનમોલ અહી ઉપદેશો છે

દુનિયામાં અમન કાયમ રાખો, શબ્બીરનો એ સંદેશો છે

મહેંકાવશે જીવનના બાગે, શબ્બીરની ફિતરત ઝિંદાબાદ.

(9)

કરબલથી સદા હુર આપે છે, શબ્બીરની સાથે થઈ જાઓ

હક રાહ છે બસ એની રાહે, કિરદાર હુસૈની અપનાવો

કાયમનું જીવન છે અહિયાં તો, લબ્બૈક કહી દોડી આવો

આ રાહ ઉપર બંને જગની, છે કાયમી રાહત ઝિંદાબાદ.

(10)

સરવરની અઝાદારી માતમ શબ્બીરનો ગમ કાયમ રહેશે

છે ચૌદસો વર્ષોથી ઊંચો, ગાઝીનો સદા પરચમ રહેશે

કરબલની કથા કાયમ રહેશે, આ ગમની સદા મોસમ રહેશે.

આ ફર્શે અઝાનો ફૈઝ રહે, ઝહરાની નેઅમત ઝિંદાબાદ

(11)

સરવરની અઝાદારી માટે, એક કોમને રબ ખુદ ખલ્ક કરે

હૈદરની વિલાયત આપી દે, ને કરબોબલાનો ઇશ્ક ભરે

મઝ્લૂમના માતમદાર બની, મઝ્લૂમના ગમને દિલમાં ધરે,

ઝહરાની દુઆઓના સદકે, ઝૈનબની અમાનત ઝિંદાબાદ.

(12)

'ખાદિમ' ને 'કલીમે કરબોબલા' છે ફર્શે અઝાના પરવાના

મઝ્લૂના હામી થઈને એ તબ્લીગ હુસૈની કરવાના

ને કરબોબલાને યાદ કરી એ જામ હુસૈની પીવાના

હર દૌરમાં કાયમ રહેવાની આ હકની હિમાયત ઝિંદાબાદ.