પહેચાન છે અબૂ તાલિબ

 

 

بِسْمِ اللّٰهِ الرَّحْمٰنِ الرَّحِيْمِ

 

ખુદાના દીનની પહેચાન છે અબૂ તાલિબ,

નબીના દીન પર અહેસાન છે અબૂ તાલિબ.

 

બુલંદ આપની ઇજ્જત, બુલંદ સરદારી,

કે શાન ખુદ કહે જીશાન છે અબૂ તાલિબ.

 

પઢી જો સૂરએ ઇમરાન તો ખબર પડશે,

ખુદાના બોલ છે, ઇમરાન છે અબૂ તાલિબ.

 

ખુદા કુરઆનમાં આ કોના ઘરની વાત કરે?

મનન તું કર કે એ ફરમાન છે  અબૂ તાલિબ.

 

ખુદાના દીનની તબ્લીગ માટે ઢાલ બની,

નબીની સાથમાં હર આન છે અબૂ તાલિબ.

 

નબીની પરવરીશ કરનારને કહે કાફિર ?

કે ખાનદાની મુસલમાન છે અબૂ તાલિબ.

 

ખલીલે રબના રહ્યા વારિસો વસી વાલી,

અઝલથી સાહિબે ઈમાન છે અબૂ તાલિબ.

 

મદીના, કરબોબલા ને નજફ અને મક્કા,

તમામ મુલ્કના સુલતાન છે અબૂ તાલિબ.

 

નબીએ કોના ખભા પર વિતાવ્યું છે બચપણ?

પિતા અલીના, એ ઇન્સાન  છે અબૂ તાલિબ.

 

અકીલ, મુર્તઝા, જાફર ને હઝરતે તાલિબ,

અનોખા આપના સંતાન  છે અબૂ તાલિબ.

 

સખી, શરીફ, શુજા, ઇલ્મ, હિલ્મના માલિક,

કે સર્વ ગુણોમાં, ગુણવાન છે અબૂ તાલિબ.

 

તમારા ખૂનથી કાયમ હર્યુભર્યું જ રહ્યું,

નબીના દીનનું ઉદ્યાન છે અબૂ તાલિબ.

 

ન હોતે આપ તો દીને રસૂલ  ના હોતે,

હજારો  આપના અહેસાન છે અબૂ તાલિબ.

 

ગુલામ આપનો એથી "કલીમ" છે જગમાં,

ગુલામી આપની સન્માન છે અબૂ તાલિબ.

 

મોમિન ખાદિમહુસૈન "કલીમ" વલેટવા.

 

ફઝીલત કાઝિમની

 

بِسْمِ اللّٰهِ الرَّحْمٰنِ الرَّحِيْمِ

 

શું શાન છે ઇજ્જત રુત્બો છે, અફ્ઝલ છે ફઝીલત કાઝિમની,

આબિદ ને સખી, સાબિર, સાજિદ, વલ્લાહ રે અઝમત કાઝિમની.

 

છે ઇલ્મમાં જાફરના વારિસ, ને ઇલ્મે લદુન્નીના માલિક,

હર એક સિફત હૈદરની મળે, હૈદરની વિરાસત કાઝિમની.

 

હર એક ઝબાનોના જ્ઞાની, ઇન્સાનની હો હૈવાનની હો,

અલ્લાહના અઢારે આલમમાં ઝળકે છે ઇમામત કાઝિમની.

 

એ બાબે હવાઇઝના માલિક, હર એક ઉપર છે નજરે કરમ,

હો દોસ્ત કે દુશ્મન હર એક પર સરખી છે સખાવત કાઝિમની.

 

એ અંધને આંખો આપી દે, ને દિલના હાલ સુણાવી દે,

ઇન્સાનની બુદ્ધિમાં ક્યાંથી આવે એ  કરામત કાઝિમની.

 

ના ફક્ત હરામ હલાલ સુધી બુદ્ધિ એની મર્યાદિત છે,

સૌ ગૈબની વાતો જાણે છે, અલ્લાહની હુકુમત કાઝિમની.

 

હર એક દિવસ રોઝામાં રહે, ને રાત નમાઝોમાં ગુજરે,

મખ્લૂકને માટે માંગે દુઆ, છે ઉચ્ચ ઇબાદત કાઝિમની.

 

અલ્લાહની કુદરત ગમમાં છે, સૌ દર્દમાં આંસુ સારે છે,

બગદાદની કેદમાં જુલ્મ થયો, થઈ ગઈ છે શહાદત કાઝિમની.

 

ક્યાં તારા વિચારો ને શબ્દો, ક્યાં ઇલ્મ હતું તારામાં "કલીમ"

કાઝિમનો કરમ કે લેખી છે, જે આજ તેં મિદ્હત કાઝિમની.

મોમિન ખાદિમહુસૈન "કલીમ" વલેટવા.

ઉનવાન અલી અસ્ગર

 

بِسْمِ اللّٰهِ الرَّحْمٰنِ الرَّحِيْمِ

 

છે આજ ફઝીલતનું ઉનવાન અલી અસ્ગર,

સરવરનું બોલતું છે કુરઆન અલી અસ્ગર.

 

શબ્બીરના ચમનમાં ખીલ્યું છે ફૂલ આજે,

મેહકી રહ્યું છે એથી ઉદ્યાન અલી અસ્ગર.

 

શબ્બીરના ગગન પર તું ચાંદ થઈને ચમક્યો,

તારા રુઆબ અલવી, જીશાન અલી અસ્ગર.

 

બસ એક ઈશારે તેં જાલિમને કર્યા રડતાં,

 તેં જંગ વગર  માર્યું મેદાન અલી અસ્ગર.

 

લાખોની ફૌજ સામે, શું સબ્ર હતી તારી,

તૌહીદ કરે તારા ગુણગાન અલી અસ્ગર.

 

સીંચીને લોહી કીધું ઇસ્લામનું જતન તેં,

દી પર છે લાખ તારા અહેસાન અલી અસ્ગર.

 

બાબુલ મુરાદ છે તું કરજે મુરાદ પુરી,

અય નયનવાના વાલી, સુલતાન અલી અસ્ગર.

 

સદીઓથી કૈક આગળ, તારા એ છ મહિના,

કેવી રીતે લખું હું ગુણગાન અલી અસ્ગર.

 

દુઃખ, દર્દ ને હતાશા, સંકટ, વિકટ સમય છે,

જીવન બનાવી દેજો આસાન અલી અસ્ગર

 

મોમિન ખાદિમહુસૈન "કલીમ" વલેટવા.

અસ્ગરનું આગમન છે

 

بِسْمِ اللّٰهِ الرَّحْمٰنِ الرَّحِيْمِ

 

સરવરના ઘરમાં આજે અસ્ગરનું આગમન છે,

સરવરના ગુલબદનની ચર્ચા ચમન ચમન છે.

 

સૌ અંબિયા ને મુર્સલ ગુણગાન એના ગાએ,

સદીઓ ઉપર છે ભારી, છ માહનું જીવન છે.

 

ખુશીઓ મનાવે હૂરો, મબરૂક યા હુસૈના,

ને અર્શ પરથી આવે સલવાતના પવન છે.

 

ફૂલો તમામ જગના એનાથી પામે ખુશ્બૂ,

ઝહરાના બાગનું એ શોભિત, હંસી, સુમન છે.

 

હસતો રહું છું કાયમ હર દુઃખ મુસીબતોમાં,

બેશીરની સબરનું  દિલમાં સદા મનન છે.

 

વેઠી તેં પ્યાસ રણની, મુસ્કાન હોઠે રાખી,

તારી આ સબ્ર પર તો ઐયૂબનું નમન છે.

 

હાલત બગાડી નાખી હુરમલની કરબલામાં,

લાનત પડી ખુદાની, મેહશર સુધી પતન છે.

 

જે કામ થઈ શક્યું ના એ કામ તે કર્યું છે,

ઇસ્લામ જીવતો રાખ્યો, શું મરહબા જતન છે.

 

ઝાલીને હાથ અસ્ગર લઇ જાય કરબલામાં,

અલ્લાહથી દુઆ છે બસ આખરી સપન છે.

 

ઇબ્ને હુસૈન તમને ખાદિમ હુસૈન વિનવે,

કરજો કબૂલ દિલથી જે આપના કવન છે.

 

દેજો "કલીમ"ને પણ એક આશરો છે આશા,

જન્નતની જાગીરોમાં જે ભવ્યતમ ભવન છે.

 

મોમિન ખાદિમહુસૈન "કલીમ" વલેટવા.