અબ્બાસ પર

 

بِسْمِ اللّٰهِ الرَّحْمٰنِ الرَّحِيْمِ

મન્કબત લખવી'તી મારે બાવફા અબ્બાસ પર

લઈને આવી શેઅર પરચમની હવા અબ્બાસ પર

 

છે વફાનો એક કાબા ને કરે એથી તવાફ

ચૌદ સદીઓથી ફિદા છે અલ્કમા અબ્બાસ પર

 

બાવફા, કમરે-બની હાશિમ, અને અબ્દે-હુસૈન

આ બધા અલ્કાબ કેવળ શોભતા અબ્બાસ પર

 

શબ્બરે શબ્બીરને કીધું ઉતારી લો નજર

ચાંદની લાગે નજર ના આપણા અબ્બાસ પર

 

આખરી શ્વાસો સુધી "ભાઈ" નહીં, "આકા" કહ્યા

છે વફાદારીની સઘળી ઇન્તેહા અબ્બાસ પર

 

શેહની મરઝીથી ખસેડયા છે આ ખૈમા, શિમ્ર, સુણ!

તારી મરજી ચાલશે ક્યારેય ના અબ્બાસ પર

 

દીન પર કુરબાન કીધા કરબલામાં હાથ બે

એના બદલે જન્નતોમાં લઈ ગયા અબ્બાસ, પર

 

નામ લેતા આપનું માસૂમ ઉભા થઈ ગયા

શું લખું બીજી હવે મદહો-સના અબ્બાસ પર

 

ઝૈનબો-કુલસૂમ સીવે ભાઈના જામા હવે

કેવા સુંદર લાગશે કપડાં નવાં અબ્બાસ પર!

 

મર્તબો અલ્લાહની નજદીક જોઈ એમનો

રશ્ક કરતા જાય છે સૌ ઔલિયા અબ્બાસ પર

 

અંબિયા શાને સલામી ના ભરે એ ઝાતની?

ગર્વ લે છે ખુદ જનાબે ફાતેમા અબ્બાસ પર

 

શામીઓ સામે રજઝ આજે પઢે છે જોશમાં

ફખ્ર કરતા કરતા શાહે કરબલા અબ્બાસ પર

 

ઇલ્મમાં કહીએ, 'દરે-ઇલ્મે-અલી' અબ્બાસને

જંગમાં શોભે તો કેવળ 'લાફતા' અબ્બાસ પર

 

શાહ પર કુરબાન થઈ પામી ગયા રબની રઝા

સૈયદા આજે તો ખૂબ જ ખુશ થયા અબ્બાસ પર

 

મોકલે છે હર ઘડી સલવાત હુબદારે-હુસૈન

બેસતા, ઉઠતા, ને સૂતા, જાગતા અબ્બાસ પર

 

હાફિઝે-કુરઆન, આલિમ, દીને-અહમદના ફકીહ

તે સમયના આલિમો નિર્ભર હતા અબ્બાસ પર

 

એટલી શેહની ગુલામી પર, ખુશી વધતી ગઈ

જેટલા વધતા ગયા કાયામાં ઘા અબ્બાસ પર

 

કોણ કોના પર પડ્યું છે? અય નુસેરી બોલ તું!

બાવફા હૈદર ઉપર કે મુર્તઝા અબ્બાસ પર

 

કેમ ના હોય આપનો પંજો વિલાયતનું પ્રતીક?

હાથ છે દસ્તે-ખુદાનો બાખુદા અબ્બાસ પર

 

આ "અતા", "ખાદિમ", "કલીમ", "અકબર-અલિફ", "અબ્બાસ-અકીબ"

બાખુદા પાંચેવના છે જીવ ફિદા અબ્બાસ પર

થઈ ગઈ છે

 

بِسْمِ اللّٰهِ الرَّحْمٰنِ الرَّحِيْمِ

જો દિવારે હરમ શક થઈ ગઈ છે

ને દુનિયા જોઈને છક થઈ ગઈ છે.

 

છે કાબા, હાથ પર અહમદના હૈદર,

આ ઘડીઓ કેવી રોચક થઈ ગઈ છે

 

જોઈ બીન્તે અસદના મરતબાને,

બધી હુરો અવાચક થઈ ગઈ છે

 

હતું નક્કી જ કે કાબામાં આવે,

વિલાદત ક્યાં અચાનક થઈ ગઈ છે.

 

મુબારકબાદી પહેલી આપવામાં

ફરિશ્તાઓમાં રકઝક થઈ ગઈ છે

 

હતી તાઝીમના લાયક એ પહેલાં,

હવે ચુમવાના લાયક થઈ ગઈ છે.

 

અલીની મહેફિલે આવ્યો તો જોયું

સફો નબીઓથી ભરચક થઈ ગઈ છે

 

તૂટી છે જ્યારથી કાબાની દીવાલ

વધારે મનને મોહક થઈ ગઈ છે

 

આ મારી ઝાત ઝિક્રે-પંજેતનમાં

રઝાએ-રબનું ચુંબક થઈ ગઈ છે

 

જો મરિયમ આસિયા કુલસૂમ આજે

અલીની મા ની સેવક થઈ ગઈ છે

 

અલીની રાહમાં જાવક છે, એથી

વધારે મારી આવક થઈ ગઈ છે

 

દિલે ફુરકાન નાઝિલ થઈ રહ્યું છે

અલીના દ્વારે દસ્તક થઈ ગઈ છે

 

ઘણો ઇતરાય છે ખૈબરમાં મરહબ

પણ એની મૌત બરહક થઈ ગઈ છે

 

વિચારે ફૌજ કે શી રીતે ભાગે?

અહીં ગાઝીની ખંદક થઈ ગઈ છે

 

લગાવ એક નારો મહેફિલને ગરમ કર

વધારે પડતી ઠંડક થઈ ગઈ છે.

 

કસીદા ગાય છે મારા લખેલા,

હુરો પણ મારી ચાહક થઈ ગઈ છે.

 

અલીની મદ્હગોઈ ચારે જણના

અમલનામાનું શીર્ષક થઈ ગઈ છે

 

કલીમ અતા અલીફ અકીબ

અલી વગર કશું નથી

 

بِسْمِ اللّٰهِ الرَّحْمٰنِ الرَّحِيْمِ

 

કહે છે પોતે કિબ્રિયા અલી વગર કશું નથી

નદી ચમન ગગન ધરા અલી વગર કશું નથી

 

ખુદા કબૂલ નૈ કરે, શિફા પણ આપશે નહીં

તું કર દુઆ કે કર દવા, અલી વગર કશું નથી

 

અલીના ફઝ્લથી બન્યા નબી નબી વલી વલી

આ અંબિયા આ ઔલિયા, અલી વગર કશું નથી

 

અલીના દીકરાઓનો, તમારા માથે હાથ છે

અય હુર! તમારા મર્તબા, અલી વગર કશું નથી.

 

હર એક જંગ જીતવા,અલી જ કામ આવશે,

કહે નબીને ખુદ ખુદા,અલી વગર કશું નથી.

 

અસાની વાત હોય કે,ઈસા મસિહની શિફા,

બધા અલીના મોઅજીઝા, અલી વગર કશું નથી.

 

પડી'તી જ્યારે મુશ્કિલો,મદદમાં કોણ આવતું ?

પુકારતા'તા અંબિયા, અલી વગર કશું નથી.

 

અશિરથી ગદીર તક ને કરબલાથી આજ તક,

અધૂરી દીનની કથા,અલી વગર કશું નથી.

 

ગુલામ અલી મહેર મુજાહીદો મુશાહીદો ઝહીર

હર એક પીર કહી ગયા, અલી વગર કશું નથી.

 

ખુદાથી માંગે જો દુઆ,અલીના માટે મુસ્તફા,

તો દે અલીના વાસતા, અલી વગર કશું નથી.

 

ફુરુએ દીનમાં અલી,ઉસુલે દીનમાં અલી,

કહે ખુદાના કાયદા, અલી વગર કશું નથી.

 

અમલ વિલા વગરના જો, ખુદા સમક્ષ આવશે

તો મોઢે મારી કહેશે જા, અલી વગર કશું નથી.

 

ઘણાં દિવસ વીત્યા પછી ખબર પડી છે ફોજને,

કહી રહ્યા'તા ભલ ભલા, અલી વગર કશું નથી.

 

વિલાયતે અલી જ છે જે બેવ જગમાં ચાલશે,

મરેલા હો કે જીવતા અલી વગર કશું નથી.

 

જો એનો ઝિક્ર થાય ના, તો ઝિક્ર ઝિક્ર શું રહ્યો ?

આ મહેફિલો મુશાયરા અલી વગર કશું નથી.

 

બધો છે ફૈઝ એમનો ટકી રહી છે જિંદગી,

કે આ કલીમે કરબલા અલી વગર કશું નથી.

જિગરદાર અલમદાર અલી

                                                             بِسْمِ اللّٰهِ الرَّحْمٰنِ الرَّحِيْمِ

પિતા હસનૈનના, ઝહરાના પતિ, ભાઈ મોહંમદના જિગરદાર અલમદાર અલી

નૂર અલ્લાહનું, અહેમદનું જિગર, ઇલ્મ નગર, હકની ડગર, અદ્લની સરકાર અલી

 

તે શુજાઅતનો, ફસાહતનો, બલાગતનો, વિલાયતનો, ઇમામતનો, સખાવતનો ધણી

ને મુસીબતમાં હરેક જણનો, ગરીબીમાં ગરીબોનો, યતીમીમાં યતીમોનો મદદગાર અલી

 

અલી અલ્લાહનો ચહેરો, અલી અલ્લાહનો પડદો છે અલી શાહે નજફ, શાહે ઝમન

છે બહાદુર સખી વિદ્વાન નિડર પીર વલી નફ્સે નબી સાહિબે કિરદાર અલી

 

અલી અવ્વલ અલી ઔસત અલી આખર અલી હર એક ઝમાનામાં ઇમામ

બાર ઇમામોમાં મળે પહેલા અને ચોથા અને આઠમાં દસમાં થઈ કુલ ચાર અલી

 

અલી અલ્લાહની રહમતનો છે મઝહર અને અલ્લાહની બેજોડ જલાલતનો ધણી

રબની નેઅમત છે મોહિબ પર તો મુનાફિક ઉપર અલ્લાહનો ફિટકાર અલી

 

અલી અક્બર અલી ઔસત અલી અસ્ગર, હતા હર એક અલી શાહના હર એક પિસર

હોત સો પણ જો પિસર એમના, તો રાખતે શબ્બીર બધા નામ લગાતાર અલી

 

હોઠ પર ઝિક્રે અલી, મદ્હે અલી, શાને અલી, થઈને સદા ફૈઝે અલી જારી રહે

ઝિક્રે હૈદરમાં છે નિકળેલા સુખન મારા પરંતુ છે હકીકતમાં સુખનકાર અલી

 

યુદ્ધ મેદાનમાં સન્નાટો છવાયો અને મરહબ પછી કિલ્લામાં છૂપાયો છે હવે,

તેગ કમ્મરમાં, અલમ હાથમાં લઈ આવે છે ખૈમાંમાંથી ખૈબરમાં ખબરદાર અલી

 

નૂહે નૌકામાં દીધી, યુસુફે કૂવામાં દીધી, યૂનૂસે દરિયામાં દીધી, એક દુઆ

અલ મદદ યા શહે અબરાર અલી, સાહિબે અમ્માર અલી હૈદરે કર્રાર અલી

 

આપનું નામ લઈ લઈને બધા ગર્વથી દુનિયાના ખૂણે ખૂણે ઉઠાવે છે શિખર

એ હિમાલય હો કે અરવલ્લી હો કે નીલગિરી સાતપુડા વિંધ્ય કે ગિરનાર અલી

 

છે અલી વજ્હે ખુદા, નૂરે ખુદા, અમ્રે ખુદા, દસ્તે ખુદા, ઐને ખુદા, નફ્સે ખુદા

હાલતા ચાલતા પૃથ્વીની સપાટી ઉપર આપે છે ખુદાવંદના દીદાર અલી

 

જોઈ લો મીર ખલીક મીર અનીસ મીર મુનિસ મિર્ઝા દબીર મીર તકી મીર ફસીહ

મરસિયાખ્વાન બન્યા આપના બેટાની મોહબ્બતમાં તમારા આ ગઝલકાર અલી

 

શામીઓ જીતના ડંકાઓ વગાડે છે અને જીતના ફાંકામાં રહે જાણ્યા વગર

બળતા ખૈમાઓના પડદાઓની પાછળ હજુ શબ્બીરનો એક જીવે છે બીમાર અલી

 

કદી મેઅરાજમાં દેખાય ટહેલતા, કદી ધરતી ઉપર ઊંઘ્યા થઈ માટીના પિતા

અર્શની ટોચથી લઈ પૃથ્વીના પાતાળ સુધી આપનો દેખાય છે વિસ્તાર અલી

 

કદ્ર કીધી નહીં જેણે, જે અદાવતમાં રહ્યો છે, જે કદી શું છે અલી જાણ્યો નથી

આપના માટે ખુદા એવા મુનાફિકને કરે પોતાની રહેમતથી તળી-પાર અલી

 

આપની જાન ઉપર, માલ ઉપર, ચાલ ઉપર, હાલ ઉપર, આલ પરિવાર ઉપર

મારી હો જાન ફિદા, માલ ફિદા, ચાલ ફિદા, હાલ ફિદા, આલ પરિવાર અલી

 

એના દરવાજે ઉભેલા છે બધા નબીઓ અને વલીઓ અને વસીઓ અને જિન્નો, મલક

ને ચલાવે છે રિસાલતનો, વિલાયતનો, વિસાયતનો ઇમામતનો આ સંસાર અલી

 

એણે ધરતીને બિછાવી, અને અંબરને ઉઠાવ્યું, અને જારી કર્યા ઝરણાં ને નદી

કર્યું નસ્નાસનું જિન્નાતનું સર્જન અને ખુદ આદમે ખાકીને છે ઘડનાર અલી.

 

એને 'કુન'ની શુ જરૂરત એને કહેવું ન પડે 'થા' બસ ઇરાદો કરે થઈ જાય બધું,

સલ્તનત આપને અલ્લાહે દીધી એવી કે જેની ન કોઈ હદ છે ન વિસ્તાર અલી.

 

એને અલ્હમ્દની તફ્સીર કહો, ઇઝ્ઝતે તક્બીર કહો, સાહિબે તન્વીર કહો

કહો પીરાને તરીકત, કહો સરકારે શરીઅત, કહો અલ્લાહનો ઇઝ્હાર અલી

 

આપના શત્રુના ષડયંત્રો થશે ખાક, અને આપના શીઆ બધા દિલશાદ થશે

રસૂલલ્લાહે કહ્યું છે કે જહન્નમ અને જન્નતના છે મહેશરમાં વહેંચનાર અલી

 

થશે દુનિયામાં પરિવાર ને ઓલાદથી, મહેશરમાં થશે જન્નતે આ'લાથી ફકીર

ઝુલ્ફિકારે અબદી લઈને કરે આખી ખુદાઈમાં જે ખિલ્કતની ઉપર વાર અલી

 

વીંટી સાઇલને અતા કીધી તો મુસહફમાં ખુદાવંદે તઆલાએ ઉતારી આયત

યાને ભાવી ગયો અલ્લાહને, અલ્લાહ કસમ! આપનો આ નેકીનો વ્યવહાર અલી

 

કરબલા સાંભળી તો જાણ્યું કે પ્રત્યેકનો પ્રત્યેક અમલ એક સદા દેતો હતો

સિંહની લલકાર ને મઝ્લૂમની તલવાર ને બીમારની ઝંજીરનો ઝણકાર અલી

 

અલી ઉપર, અલી નીચે, અલી આગળ, અલી પાછળ, અલી જમણે ડાબે.

અર્શની ટોચ ઉપર, કાબાની અંદર, અને હર જીવના અંદર છે અને બ્હાર અલી

 

કઈ હિંમત કઈ તાકત, કઈ જુર્અતથી, કયા જોરથી, કોનામાં છે દમ, ત્યાં એ ચઢે!

એક આપ જ છો ફકત સાહિબે મેઅરાજના બન્નેવ ખભે શાનથી ચઢનાર અલી

 

દાબતુલ અર્ઝના મિસ્દાક બની કબ્રથી બાહર જો નિકળશે તો બધા જાણી જશે

હુજજતુલ્લાહ છે કાએમ છે, મોહંમદ છે ને પાછા છે આ દુનિયા મહીં ફરનાર અલી

 

બોલી મહેફિલની આ રંગત આ ઘટા ઉઠતી આ ચોમેરથી હૈદરના મોહિબ્બોની સદા

વાદળો આવી ચઢ્યા આજે નજફથી અને બાદરપુરે વરસે છે મુશળધાર અલી

 

એક "કલીમ" એક "અતા", આપના ઝાકિર હતા, પણ એમાં ઉમેરાયા "અલિફ" સાથે "અકીબ"

આપનો ફઝ્લ છે, મહેનત છે મુજાહિદની કે આજે અમે બે માંથી થયા ચાર અલી

 

ચારેય બંદા છે અલી આપના ચાહે તે "કલીમ" હોય "અતા" હોય "અલિફ" હો કે "અકીબ"

રબની સામે એ કયામતમાં ફકત રહેશે તમારી જ શફાઅતના તલબગાર અલી