સબીલે હુસૈન પર

 

بِسْمِ اللهِ الرَّحْمٰنِ الرَّحِيْمِ

ઇન્સાનની નજાત સબીલે હુસૈન પર

હકની હર એક વાત સબીલે હુસૈન પર

 

કરબલની પાઠશાળામાં બેસીને માતમી

શીખે છે દીનિયાત સબીલે હુસૈન પર

 

હુર જેમ કિસ્મતોની સવારો નસીબ હો

પડશે કદી ન રાત સબીલે હુસૈન પર.

 

બોત્તેર રુત્બા પામ્યા અલૈહિસ્સલામના,

લોહીની દઈ ઝકાત સબીલે હુસૈન પર.

 

સુખ શાંતિ ને મેળવે જન્નત ધરા ઉપર.

આવે જો કાએનાત સબીલે હુસૈન પર.

 

ખુશ થઈને કહેશે પીર કે બાબા અલી જુઓ,

મોમિનની છે જમાત સબીલે હુસૈન પર.

 

પામે છે રાહગીર અહીં કાયમી જીવન,

હોતી નથી વફાત સબીલે હુસૈન પર.

 

થઈ જાય છે બુલંદ દરજ્જાઓ નફસના,

તાગૂતની છે મ્હાત સબીલે હુસૈન પર.

 

અલ્લાહની આયતમાં તું ચિંતન મનન કરી,

પામી લે સૌ મિરાત સબીલે હુસૈન પર.

 

કરબલના હર શહીદ ઉપર કર મનન જરા,

છે ઇશ્કની સલાત સબીલે હુસૈન પર.

 

આ રાહ પર "કલીમ" તું પામી લે અમરતા,

છે કાયમી હયાત સબીલે હુસૈન પર.

 

ગદીર મુસદ્દસ

 

بِسْمِ اللّٰهِ الرَّحْمٰنِ الرَّحِيْمِ

ચલ અય કલમ ગદીરની અઝમત બયાન કર

અલ્લાહથી નબીની અમાનત બયાન કર

કોને નબીએ સોંપી ખિલાફત બયાન કર

હૈદરની આન બાન ફઝીલત બયાન કર

 

દીને નબીના પાક એ અવસરની વાત કર

સજ્દો બજાવી કાગળે હૈદરની વાત કર.....૧

 

શું છે ખુદાએ પાકનું ફરમાન, ખોલી દે

શું અહમદે કર્યું હતું એલાન, ખોલી દે

શું મિમ્બરે અલીની હતી શાન, ખોલી દે

ચલ વાત માન દિલના તું અરમાન ખોલી દે

 

હકની ઝબાન ખોલ ખિલાફતની મદ્હ કર

અલ્લાહના વલી ને વિલાયતની મદ્હ કર.....૨

 

કેવા હતા ગદીરના મંઝર જણાવ તું,

કેવા હતા ખુશીમાં પયમ્બર જણાવ તું,

અલ્લાહના વલીના એ જૌહર જણાવ તું,

અલ્લાહના ઉમંગનો અવસર જણાવ તું,

 

રબના વલી, નબીના વસીનું તું નામ લે,

સાકી બની તું ખુમની વિલાયતનો જામ દે...૩

 

પીતા હતા જે બૂ ઝરો સલમાન એ શરાબ

જેને તહુરા કેહતું હો કુરઆન એ શરાબ

દિલમાં વધારે ઇશ્ક ને ઇરફાન એ શરાબ

થઈ જાઉં જેને પીને હું મસ્તાન એ શરાબ.

 

સાકી તું લાવ મય જે અલીની વિલાની છે,

ચાખે જો જિબ્રઈલ તો બોલે મજાની છે.....૪

 

બોલી કલમ કે ચાલ બતાઉ તને ગદીર,

ભેગા કરે છે સૌને જો નબીઓના એ અમીર,

ત્યાં જો ઉભા રહ્યા છે બધા ઔલિયાના પીર,

વૃદ્ધો, યુવાન, રાહ જુએ છે બધા સગીર,

 

સૂરજ છે માથા પર અને ગરમી છે કારમી,

ટાઢક વળી દિલે કે છે ઝિલ્હજ અઢારમી.....૫

 

હકનો હુકમ છે, કારે રિસાલત ગદીર છે,

દીને ખુદા, રસૂલની, દૌલત ગદીર છે,

રહેમાનનો કરમ છે ને રહમત ગદીર છે,

જન્નત છે મોમિનોની ને નેઅમત ગદીર છે,

 

ઊભી છે જો નબીની સવારી ગદીર પર,

રહમત ખુદાએ આજ ઉતારી ગદીર પર.....૬

 

મનકુન્તોના બયાનની તફ્સીર છે અલી,

તક્દીર હકની બોલી કે તક્દીર છે અલી,

સંપૂર્ણ આજ દીનની તસ્વીર છે અલી,

બેશક નબીના દીનની તૌકીર છે અલી,

 

હૈદરની શું બુલંદી છે જગને બતાવવા,

ઊંટોના લીધા કાઠડા મિમ્બર બનાવવા....૭

 

પહોંચાડે છે પયામ પયમ્બર ગદીરમાં,

મિમ્બર સજાવે મીસમો કંબર ગદીરમાં,

છાંટી રહ્યા છે મદ્હનું અત્તર ગદીરમાં,

ઠંડક જો આપે આજ દિવાકર ગદીરમાં،

 

હાજર ત્યાં એક લાખને ચોવીસ હજાર છે,

બળબળતા એ બપોરમાં ઉઘડી સવાર છે....૮

 

મિમ્બર ઉપર રસૂલનું એલાન સાંભળો,

ઈમાન લાવનાર મુસલમાન સાંભળો,

અય હાજીઓ! ખુદાનું આ ફરમાન સાંભળો,

ખુલ્લા કરીને કાન, ધરો ધ્યાન સાંભળો,

 

સૌથી અઝીમ આજ રિસાલતનું કામ છે,

પહોંચાડું આ પયામ તો હુજ્જત તમામ છે....9

 

મિમ્બર ઉપર અલીને બોલાવે છે જો રસૂલ,

હૈદરનો લઈને હાથ ઉઠાવે છે જો રસૂલ,

ઊંચા કરી અલીને બતાવે છે જો રસૂલ,

પોતાનો જાનશીન બનાવે છે જો રસૂલ,

 

મેઅરાજનો એ હાથ છે, સંપર્ક એ જ છે,

પરદો નથી ગદીરમાં બસ ફર્ક એ જ છે....10

 

મનકુન્તોનું બયાન છે અહમદના હોઠ પર,

ઊંચા કર્યા બે હાથથી હૈદરને કર નજર,

બેશક છે પૂર્ણ આજ રિસાલતની આ સફર,

પયગામ આજ મારો સુણી લે હર એક બશર,

 

આઝાદ હો ગુલામ, તવંગર કે હો ફકીર,

સૌ મોમિનોના આજથી મૌલા અલી અમીર..11

 

આ સાંભળીને અર્શ ઉપર ઝૂમે અંબિયા

આપસમાં એકબીજાને ભેટે છે ઔલિયા

શુક્રે ખુદા બજાવે છે સજ્દામાં ઔસિયા

જિબ્રિલ લઈને આવ્યા છે પૈગામે કિબ્રિયા

 

યા અય્યોહર્રસૂલ! વિલાયતના તાજથી,

અલ્લાહનો આ દીન મુકમ્મલ છે આજથી. 12

 

સલમાન પી રહ્યા છે ભરીને વિલાનો જામ

બૂ ઝર કરી રહ્યા છે નબીનો પયામ આમ

કમ્બર ગુલામ ઝૂમે છે લઈ લઈ અલીનું નામ

હૈદરનો હાથ ચૂમે છે હૈદરના સૌ ગુલામ

 

આદમને જેમ સજ્દે ફરિશ્તા ઝુક્યા હતા

મોમિન અલીની બૈતમાં એમ જ ઝૂકી ગયા..13

 

પીવો ને પીવડાવો મદિરા ગદીરની

પઢતા રહો "કલીમ" કવિતા ગદીરની

ભૂલે ઝમાનો કઈ રીતે ગાથા ગદીરની?

ઉજવે છે ઈદ ઇમામે ઝમાના ગદીરની.

 

દીદારથી ઇમામના તર આંખડી થશે,

તો ઈદ પર આ વર્ષે ખુશી બેવડી થશે..14

 

મોમિન ખાદિમહુસૈન "કલીમ" વલેટવા

હુર બનીને આવો તો

 

بِسْمِ اللهِ الرَّحْمٰنِ الرَّحِيْمِ

 

એ બનાવે છે કિસ્મત હુર બનીને આવો તો

આપે કરબલા દાવત હુર બનીને આવો તો

 

મૂલ્ય એના ક્યાં મોંઘા? બસ હુસૈની થઈ જાઓ,

ખૂબ સસ્તી છે જન્નત હુર બનીને આવો તો.

 

લેવા ખુદ હુસૈન આવે સામે ચાલીને તમને

એવી દિલમાં છે ચાહત? હુર બનીને આવો તો

 

દુનિયામાં સફળતા છે, કામિયાબ આખેરત

બેવ જગમાં છે રાહત હુર બનીને આવો તો

 

આવશે કઝા વકતે ખોળે માથું લઈ લેશે,

એવી દે હુસૈન ઈજ્જત, હુર બનીને આવો તો

 

છોડી દઈને ઈચ્છાઓ ચાલો રાહે હક પર જો,

ગાઝી ખુદ કરે સ્વાગત હુર બનીને આવો તો.

 

જામ કૌસરી લઈને આવે ખુદ હુસૈન અબ્બાસ

મોત પણ મળે ઉન્નત હુર બનીને આવો તો.

 

અંબિયા પણ આવીને પૂછશે ખબર અંતર

ઝંખે આપની  સોબત હુર બનીને આવો તો

 

જે વીતી ગયું એની કોઈ ના ફિકર કરજે,

છે હજીય છે મોહલત હુર બનીને આવો તો

 

રાજી થાય સરવર તો પામી લો રઝા રબની

ના રહે કોઈ હાજત હુર બનીને આવો તો

 

ફાતમી અમામાને મસ્તકે સજાવે શેહ,

એ રીતે મળે અઝમત હુર બનીને આવો તો

હું અલી ઈબ્ને હુસૈન ઈબ્ને અલી છું

 

بِسْمِ اللهِ الرَّحْمٰنِ الرَّحِيْمِ

જ્યારે ફેલાઈ ગયો શામમાં ખોટો આ પ્રચાર

બાગીઓ સામે વિજય પામી ગયા છે કુફ્ફાર

શામીઓ આલે મોહંમદને જો સમજ્યા લાચાર

આવ્યો શબ્બીરના સજ્જાદને ખુત્બાનો વિચાર

 

શામીઓ સાંભળો સજ્જાદની યલગાર

હું અલી ઈબ્ને હુસૈન ઈબ્ને અલી છું.

થરથરી ઉઠ્ઠી સુણી શામની સરકાર

હું અલી ઈબ્ને હુસૈન ઈબ્ને અલી છું.

 

આવી દરબારમાં માગે છે રજા ખુત્બાની

સમજ્યો ઝાલિમ કે સુણે કોણ કોઈ માંદાની

જા તને આપી ઇજાઝત અમે આ જુમ્આની

ને પછી આવી ગઈ જ્યારે ઘડી મૌકાની

એક પોકારથી ગૂંજી ઉઠ્યો દરબાર

હું અલી ઇબ્ને હુસૈન ઇબ્ને અલી છું.

 

 

વારિસે ઇબ્ને અલી આવી ગયો મિમ્બર પર

છે છટા એ જ અદા, બોલે કે જાણે હૈદર

છે અજબ રોબ જલાલત ને અજબ છે તેવર

દિલ ઉપર કુફ્રના જાણે કે ફરે છે ખંજર

બોલ્યા સજ્જાદ મને સમજો ન બીમાર

હું અલી ઇબ્ને હુસૈન ઇબ્ને અલી છું.

 

અમને અલ્લાહે અજબ સાત ફઝીલત આપી

ઇલ્મ ને હિલ્મ મળ્યું શાન ને શૌકત આપી

કે શુજાઅત ને ફસાહત ને મોહબ્બત આપી

કે રિસાલત છે અમારાથી, ઇમામત આપી

સૌમાં અફઝલ છે સદા મારો પરિવાર

હું અલી ઇબ્ને હુસૈન ઇબ્ને અલી છું.

 

છે નબી અહમદે મુખ્તાર અમારામાંથી

શેરે રબ હૈદરે કર્રાર અમારામાંથી

નીકળ્યા જાફરે તૈયાર અમારામાંથી

બેઉ જન્નતના છે સરદાર અમારામાંથી

જે નથી જાણતો થઈ જાય ખબરદાર

હું અલી ઇબ્ને હુસૈન ઇબ્ને અલી છું.

 

ફખ્ર છે મુજને હું મક્કા ને મિનાનો છું પિસર

ઓળખો મુજને હું ઝમઝમ ને સફાનો છું પિસર

અય્યોહન્નાસ હું મહેબૂબે ખુદાનો છું પિસર

હું જ સિદ્રા અને તૂબાની ઘટાનો છું પિસર

મારા નાના છે ખુદાવંદની સરકાર

હું અલી ઇબ્ને હુસૈન ઇબ્ને અલી છું.

 

એનો બેટો છું કે લોહીથી જે રંગીન થયા

દીન જેનાથી બચ્યો છે, અને ખુદ દીન થયા

જેમના ગમમાં બધા પક્ષીઓ ગમગીન થયા

અને જિન્નાત પણ અંધારામાં તલ્લીન થયા

બાપ મારા તો શહીદોના છે સરદાર

હું અલી ઇબ્ને હુસૈન ઇબ્ને અલી છું.

 

મારા દાદાએ આ ખિલ્કતને પઢાવ્યો કલમો

જંગમાં જેમણે ઇસ્લામનો ગાડ્યો ઝંડો

જેમણે બદ્ર ને ઓહદમાં બતાવ્યો જલવો

પાકો પાકીઝા અરબમાંથી છે જેનો શજરો

કુફ્ર અલ્લાહનું કીધું નથી પળવાર

હું અલી ઇબ્ને હુસૈન ઇબ્ને અલી છું.

 

એનો દીકરો છું હું જેને વલીયુલ્લાહ કહો

યાસૂબુદ્દીન કહો, જેને યદુલ્લાહ કહો

આખી કોનૈનના જેઓને શહેનશાહ કહો

આલે યાસીન ને કલ્બે રસૂલલ્લાહ કહો

જેણે ખૈબરના ઉખેડયા છે બધા દ્વાર

હું અલી ઇબ્ને હુસૈન ઇબ્ને અલી છું.

 

એનો દીકરો છું, જે ઉમદા છે ને ગૌરવશાળી

જે બહાદુર છે ને મક્કાના છે જે રહેવાસી

જે છે અલ્લાહથી, જેનાથી છે અલ્લાહ રાજી

જંગમાં કોઈને પણ પીઠ નથી દેખાડી

ગૈર ફર્રારનો દીકરો છું હું હુશ્યાર

હું અલી ઇબ્ને હુસૈન ઇબ્ને અલી છું.

 

મક્કી, મદની,ઓહદી, ખૈબરી, જેને કહીએ

બદ્રી,ખૈફી, અકબી, અબ્તહી, જેને કહીએ

સખી, નિર્ભય, શજરી, હાશમી, જેને કહીએ

અરબી, સિંહ, રઝી, સૈયદી, જેને કહીએ

એ અલી નામ ધરાવું છું સિતમગાર!

હું અલી ઇબ્ને હુસૈન ઇબ્ને અલી છું.

 

સાંભળો! ફાતેમા ઝહરાનો પિસર છું લોકો!

સઘળી સ્ત્રીઓની મલિકાનો પિસર છું લોકો!

વારિસે ખાનએ કાબાનો પિસર છું લોકો!

હું કરીમ ઇબ્ને કરીમાનો પિસર છું લોકો!

નામ ઝહરાનું સુણી થરથર્યા કુફ્ફાર

હું અલી ઇબ્ને હુસૈન ઇબ્ને અલી છું.

 

નામ ઝહરાનું જો આવ્યું તો સહન થઈ ન શક્યું

આપ અઝાન આપ મોઅઝ્ઝિનને યઝીદે કીધું

નામ બાગીએ જેવું અલ્લાહો અકબર લીધું

વાક્ય શબ્બીરના દીકરાએ પછી દોહરાવ્યું

હા કરું છું હું આ તૌહીદનો ઇઝ્હાર

હું અલી ઇબ્ને હુસૈન ઇબ્ને અલી છું

 

લાઇલાહા જો સુણ્યું એની ગવાહી આપી

અશ્હદુ અન્ન મોહંમદ રસુલુલ્લાહ સુણી

બોલ્યા સજ્જાદ, કે બેશક આ મોહંમદ છે નબી

નાના મારા છે કે તારા, તું કહી દે જલ્દી

તું કરી શકશે ન આ વાતનો ઇન્કાર

હું અલી ઇબ્ને હુસૈન ઇબ્ને અલી છું

 

મારા બાબાને કર્યા ઝુલ્મથી શા માટે શહીદ?

તે છતાં સમજી રહ્યો છે તું આ અવસરને ઈદ!

શું ન'તી હકકે કરી ઉલ્ફતે શેહની તાકીદ?

થાય તારા ઉપર અલ્લાહની લાનત અય યઝીદ!

તને દોઝખના હું આપું છું સમાચાર

હું અલી ઇબ્ને હુસૈન ઇબ્ને અલી છું

 

આખી દુનિયાએ ઇમામતની ફસાહત જોઈ

કુફ્ર પર કેવી છે ઈમાનની તાકત જોઈ

એક બીમારની દરબારમાં હૈબત જોઈ

કોઈ ભૂલી ન શક્યું એવી જલાલત જોઈ

આજ પણ ગૂંજે છે હુજ્જતની આ પોકાર

હું અલી ઇબ્ને હુસૈન ઇબ્ને અલી છું

 

અય "અલિફ" હર ઘડી હુજ્જતની મોહબ્બતમાં રહો

અય "કલીમ" આબિદે બીમારની તબિયતમાં રહો

કહો "ખાદિમ"ને કે સજ્જાદની ખિદમતમાં રહો

શાહનો ઝિક્ર કરી, શાહની જન્નતમાં રહો

કબ્રમાં હશ્રમાં આપીશ હું દીદાર

હું અલી ઇબ્ને હુસૈન ઇબ્ને અલી છું

 

 

 

 

લકબ

વલીયુલ્લાહ - અલ્લાહના વલી

યાસૂબુદ્દીન- મધમાખીઑની રાણી માટે વપરાય છે શબ્દ, મધમાખીની રાણી જ્યાં પણ હોય આખા મધપૂડાની માખીઓ ત્યાં જઈને મધપૂડો બનાવી નાખે અલી (અ.) મોમિનના યા'સૂબ છે જ્યાં પણ અલી (અ.) હશે ને, આખી દુનિયાના મોમિનો ત્યાં આવી જશે.

યદુલ્લાહ - અલ્લાહનો હાથ

મક્કી- મક્કાનાનો રહેવાસી

મદની- મદીનાનો રહેવાસી

ઓહદી- ઓહદવાળા

ખૈબરી- ખૈબરવાળા

બદ્રી- બદ્રવાળા

ખૈફી- જગ્યા છે અક્બા, ઓહદ,બદ્ર આ દરેક જગ્યા છે જે ઇસ્લામ સાથે સંકલાયેલી છે એ બધાવાળા અલી છે

શજરી- પાક શજરાવાળા,

રઝી- જે અલ્લાહથી રાજી હોય