એ જ છે તારો હકીકી રાહબર દીનિયાત પઢ

 

بِسْمِ اللّٰهِ الرَّحْمٰنِ الرَّحِيْمِ

એ જ છે તારો હકીકી રાહબર દીનિયાત પઢ,

ઇલ્મથી તારે થવું હો તરબતર, દીનિયાત પઢ.

 

જુલ્મ જો તારા ઉપર કોઈ કરે, ખામોશ રેહ,

ત્રાજવા અન્યાયથી જો એ ભરે, ખામોશ રેહ,

કરબલાથી લે સબક તું સબ્ર કર, દીનિયાત પઢ.

 

ફિક઼્હના, અખ઼્લાક઼ના મોતી મઢ્યા છે રેહબરે,

મોતીઓ એ પામશે જે એના સાગરમાં તરે,

ના મળ્યું કઈ એવો ના સંતાપ કર, દીનિયાત પઢ.

 

ઇલ્મના એ દર થકી સૌ ઇલ્મનાં ઝરણાં ઝરે,

રક્તનું સિંચન છે એમાં, રૂહ ફૂંકી રેહબરે.

બાખુદા તૌહીદ તકની છે ડગર, દીનિયાત પઢ.

 

ભાઈ-બહેનો, મોમિનોના હક અદા કરતો રહે,

આદતો બુરી જીવનથી તું જુદા કરતો રહે,

થઈ જશે સહેલું આ તારું જીવતર, દીનિયાત પઢ.

 

ભૂખ છે જો ઇલ્મની તો આવ થાશે તરબતર,

પાથર્યું છે પીરે એને આવ દસ્તરખ્વાન પર,

થઈ જશે ઇસ્લામથી તું બાખબર, દીનિયાત પઢ.

 

દૂર છે એ સૌ મુરીદોથી તો જિસ્માની રીતે,

છે સદા સાથે ને સાથે પીર રૂહાની રીતે,

એના ચહેરા પર જો કરવી હો નજર, દીનિયાત પઢ.

 

ખોખલી આવી મોહબ્બત તો કદી ચાલે નહીં,

પીરને માને છે પણ તું પીરનું માને નહીં,

છે અકીદત પીરથી સાચી અગર, દીનિયાત પઢ.

 

આવનારા રાહબરને પ્યારનો ઉપહાર દે,

જે મુજાહિદને દીધો'તો એવો તું સહકાર દે,

થઈ જશે બન્નેવ જગમાં તું અમર, દીનિયાત પઢ.

 

પઢ! હે મોમિન, પઢ! અને એના ઉપર તું કર અમલ,

એ રીતે જીવીને આખેરતની પામી લે મજલ,

નફ્સના અંધારને તું દૂર કર, દીનિયાત પઢ.

 

એ ખુદાના દીનની હર  વાતમાં મળશે તને,

તફસીરે કુરઆનમાં, દીનિયાતમાં મળશે તને.

શબ્દે શબ્દે પામશે તું રાહબર દીનિયાત પઢ.

ખાદિમહુસૈન "કલીમ" મોમિન.

આજ રેહલત છે મુજાહિદ પીરની સંસારથી

 

 

بِسْمِ اللّٰهِ الرَّحْمٰنِ الرَّحِيْمِ

આજ રેહલત છે મુજાહિદ પીરની સંસારથી,

એક કળી જઈને મળી છે હૈદરી ગુલઝારથી.

 

આંચકો દઈ ગઈ મુરીદોને સખત તારી વફાત,

હર નયન છલકી ઉઠ્યાં છે આજ ગમના ભારથી.

 

રહમતો દેતો હતો રબ તારા કહેવાથી સદા,

શું નથી પામ્યું જમાતે આપના એ દ્વારથી.

 

એ રીતે કીધી જમાઅતની હિદાયત સર્વદા,

હર હૃદયના તાર જોડાયા હૃદયના તારથી.

 

ચાલતા કીધા મુરીદોને સિરાતે મુસ્તકીમ,

રહેશે ઋણી મોમિનો સૌ તારા આ ઉપકારથી.

 

કેટલા ભટકેલ હુરોને તેં દીધી જિંદગી,

નૂર તક લાવી દીધા તેં એ બધાને નારથી.

 

આપની દીનિયાત ને તફ્સીર શી રીતે ભૂલાય ?

ગૂઢ વાતો દીનની સમજાવતા'તા પ્યારથી.

 

મોમિનો શું કૌમ સઘળી અંજલિ અર્પે તને,

સૌના દિલ જીતી લીધા તેં હૈદરી કિરદારથી.

 

પુસ્તકાલય, મક્તબા દીધું શિફાખાના દીધું,

કેટલા સધ્ધર બન્યા સૌ આપના આધારથી.

 

ચૌદ માઅસૂમીનને મળવા મુજાહિદ પીર પણ,

જન્નતી દરબાર ચાલ્યા જાફરી દરબારથી.

 

એ હિદાયતના ચિરાગો રોશની દેશે "કલીમ",

એટલે કંઈ ડર નથી રહેતો મને અંધારથી.

પીર સૈયદ મોહંમદ મુજાહિદહુસૈન બાવા સાહેબ (રહ.) 

 વિલાદત: ૧૨ સફર ૧૩૯૨ / ૨૮-૦૩-૧૯૭૨ મંગળવાર, ધોળકા

 વફાત: ૧૩ ઝિલ્કાદ ૧૪૪૩ / ૧૩-૦૬-૨૦૨૨ મંગળવાર, સિધ્ધપુર

(વય (ઉંમર):  ૫૦ વર્ષ ૨ મહિના ૧૭ દિવસ)

હાજરપીર વખતે સમયગાળો:

 આપ નામદાર હાજરપીર તરીકે મોમિન જમાઅતને ૧૯/૧/૨૦૦૬ થી ૧૩/૬/૨૦૨૨ સુધી એટલે કે ૧૬ વર્ષ, ૪ મહિના અને ૨૭ દિવસ સુધી હિદાયત કરી હતી..

 

ખાદિમહુસૈન "કલીમ"- મોમિન.

તસ્વીર સકીના

 

મા ફાતેમા ઝહરાની તું તસ્વીર સકીના,

શબ્બીરનું દિલ, આંખની તન્વીર સકીના.

 

ખુશહાલ છે શબ્બીરનું ઘર તારા જનમથી,

મિદહત કરે છે આયતે તત્હીર સકીના.

 

માસૂમા ને ઝૈનબ અને કુલસૂમ રૂકૈયા,

સરવરના પરિવારની તૌકીર સકીના.

 

આપે છે દુઆ, ઝૈનબો-કુલસૂમ બલા લે,

'ને શુક્રના સજ્દામાં છે શબ્બીર સકીના.

 

છે સબ્રનું કુરઆન હુસૈન ઇબ્ને અલી તો,

એ સબ્રના કુરઆનની તફ્સીર સકીના.

 

અબ્બાસ ઝૂકી જાય છે તાઝીમને માટે,

છે તારા એ કિરદારની તાસીર સકીના.

 

 

તોલે નહીં આવે કદી કુલ નબીઓની ધીરજ,

કરબલમાં ધરી'તી તેં અજબ ધીર સકીના.

 

ઇસ્મતની કસમ સૂરએ કૌસરની કડી તું,

કબ્જામાં રહી કૌસરી જાગીર સકીના!

 

બેચેન પઢે એના હૃદયને મળે ઠંડક,

તુજ નામમાં એવી રહી તાસીર સકીના.

 

વેઠીને તરસ આપે અતા કીધી અમરતા,

પ્યાસાઓની ટુકડીના રહ્યા મીર સકીના.

 

શબ્બીરની શહેઝાદી! "કલીમ" આપથી ઝંખે,

"મુફ્લિસ છું બનાવો તમે તક્દીર સકીના."

ખાદીમહુસૈન "કલીમ" મોમિન- વલેટવા

પીરની સંસારથી

 

આજ રેહલત છે મુશાહીદ પીરની સંસારથી,

જન્નતી  દરબાર ચાલ્યા જાફરી દરબારથી.

 

આંચકો દઈ ગઈ મુરીદોને સખત તારી વફાત,

હર નયન છલકી ઊઠ્યાં છે આજ ગમના ભારથી.

 

રેહમતો દેતો હતો રબ તારા કહેવાથી સદા,

શું નથી પામ્યું જમાતે આપના એ ઘ્વારથી.

 

તેં જમાઅત પાસ માંગી એકતાની ભેટ તો,

હર હદયના તાર જોડાયા હદયના તારથી.

 

ચાલતા કીધા મુરીદોને સીરાતે મુસ્તકીમ,

રહેશે ઋણી મોમિનો સૌ આપના ઉપકારથી.

 

કેટલા ભટકેલ હુરોને તેં દીધી જિંદગી,

નૂર તક લાવી દીધા તેં એ બધાને નારથી.

ખાદીમહુસૈન "કલીમ" મોમિન- વલેટવા તરીકત

 

રેહબર અલવિદા

 

 

અલવિદા પ્યારા મુશાહિદ પીર રેહબર અલવિદા,

આંસુઓ પણ આંખના બોલે છે ઝરમર અલવિદા.

 

શોકમય વાતાવરણ છે જાફરી ઉદ્યાનનું,

મોમિનો છે સોગમાં, રોવે છે અંતર અલવિદા.

 

વ્હાલ દીધો કોમને તેં બાપ કરતા પણ વધું,

કોમની કીધી હિદાયત જિંદગીભર અલવિદા.

 

 

બાળ, મોટેરા, યુવાનો હર કોઈ ગમગીન છે,

છે જુદાઈ આપની ગમનાક રેહબર અલવિદા.

 

છે હજી રોશન હિદાયતના દીવા, રહેશે સદા,

હકના હામી, અય હિદાયતના દિવાકર અલવિદા.

 

તારા એ અહેસાન રેહબર કોમ શી રીતે ભૂલે?

તેં વહાવ્યા ઇલ્મના હૈયામાં સાગર અલવિદા.

 

વ્હાલ સોયા આવ દીકરા ફાતેમા બોલી ઉઠ્યા,

જ્યારે આવ્યું આ જમાનાના લબો પર, અલવિદા

 

વેણ તારા છે સલામત આજ પણ હર દિલ મહીં,

રોઈ રોઈને કહે હર એક અક્ષર અલવિદા.

 

તું રજબમાં રબની મરજીથી પધાર્યો જગ મહીં,

ને રજબમાં રબથી મળવાને છે તત્પર, અલવિદા.

 

નૂરમાં જઈને ભળી ગઈ રૂહ તારી એટલે,

કહી રહ્યું છે આજ આખુંયે તને ઘર અલવિદા.

 

શાહ સવારે કરબલાને તું મળીને ખુશ થયો.

ને જગત તુજ ગમમાં બોલે છે કે રહેબર અલવિદા.

 

તેં જ શીખવાડ્યું રુદન સચ્ચાઈનું આ કોમને,

અય અઝાદારે હુસૈની શેહના દિલબર અલવિદા.

 

કરબલા સમજાવી આપે ઝાકિરે કરબોબલા,

આજ કાં અશ્રુ ન સારે કહીને મિમ્બર, અલવિદા.

 

સોગમાં કાગળ કલમ છે, શું લખે આગળ "કલીમ"?

હોજે કૌસર પર મળીશું રોજે મેહશર, અલવિદા.

 

જન્મ- ૧૪-૦૭-૧૯૪૩, ૧૦ રજબ,હિ.સ.૧૩૬૫, બુધવાર, વડોદરા

પીર સૈયદ મોહંમદ મુશાહિદહુસૈન જાફરી વફાત ૧૯-૦૨-૨૦૨૨,૧૭ રજબ,હી.સ.૧૪૪૩, શનિવાર, સિદ્ધપુર, દફન સ્થળ: મેતા

 

ખાદીમહુસૈન "કલીમ" મોમિન- વલેટવા

પામી જશે

بِسْمِ اللّٰهِ الرَّحْمٰنِ الرَّحِيْمِ

પીરનો દામન પકડ તો પંજેતન પામી જશે,

હકનો હામી થઈ જશે હકનાં રતન પામી જશે.

 

જિંદગી છે ગોર અંધારી સમજ રેહબર વિના,

ચલ તરીકતના તું પંથે નવજીવન પામી જશે.

 

દુન્યવી જંજાળ પડતી મૂક ને દીનિયાત પઢ,

હિકમતોના શુદ્ધ સોનેરી સુખન પામી જશે.

 

માર ડુબકી થઈ જશે તું માઅરેફતનો મરજીવો,

ઇલ્મ સાગરમાંથી મોંઘેરા રતન પામી જશે.

 

એ બતાવે રાહ પર તું ચાલ, બિસ્મિલ્લાહ કહી,

પંજેતનના ઘરથી, અલ્લાહનું સદન પામી જશે.

 

કેમ મોમિન કોમમાં સર્જન થયું તારું ભલા?

કર તું મુરશિદની હિદાયત પર મનન, પામી જશે.

 

આખેરત પર આંખ ધર બસ એ જ આગળ આવશે,

આખેરત પામી તો દુનિયાનું નમન પામી જશે.

 

ચૌદ પીરોની હિદાયતને અમલમાં લાવ તું,

આ સકળ સંસાર શું ચૌદે ભુવન પામી જશે.

 

ભલભલા ભૂલા પડ્યા, ભટકી ગયા છે અય "કલીમ",

રાખ રેહબરથી લગન, રબનાં જતન પામી જશે.

ઇલ્મનું બોલતું કુરઆન મોહંમદ બાકિર

                                                    

بِسْمِ اللّٰهِ الرَّحْمٰنِ الرَّحِيْمِ

ઇલ્મનું બોલતું કુરઆન મોહંમદ બાકિર,

શાનમાં લૂઅલુઓ મરજાન મોહંમદ બાકિર.

હાશમી ફાતમી અલ્વી ને હુસૈની હસની

છે ફકત આપની આ શાન મોહંમદ બાકિર

 

ઇલ્મ કાયમ છે જમાનામાં કરમથી એના

છે બધા દૌર પર એહસાન મોહંમદ બાકિર.

કેમ કલમો ન પઢે આપને જોઈ રાહિબ

આપ છો દીનના સુલતાન મોહંમદ બાકિર.

 એ ફસાહત ને બલાગતમાં અલી છે બિલકુલ,

ને મોહંમદની છે પહેચાન મોહંમદ બાકિર.

એ સદા જ્ઞાનથી અળગા ને વિખુટા રહેશે,

આપથી જે રહ્યા અંજાન મોહંમદ બાકિર.

ઇલ્મની ગૂંચના એવા છે નિવેળા કાઢ્યા

આખી કોનૈન છે હેરાન મોહંમદ બાકિર.

સબ્ર ને શુક્ર, સખાવત ને સિલેરહમી પણ

આપના ગાય છે ગુણગાન મોહંમદ બાકિર.

મિસ્કીનો મુફલિસ બેવાઓ યતીમો ઉપર

આપ કાયમ છો મહેરબાન મોહંમદ બાકિર.

આપના વારિસો ફેલાવે જગે ઇલ્મ આજે

આપનું મેહેર ગુલિસ્તાન મોહંમદ બાકિર.

આ "કલીમ" આપથી બક્ષિસની સનદ પામી લે

આટલું રાખે છે અરમાન મોહંમદ બાકિર

 

                                    ખાદીમહુસૈન "કલીમ" મોમિન

ઈલ્મનું આસમાન છે બાકિર

 

بِسْمِ اللّٰهِ الرَّحْمٰنِ الرَّحِيْمِ

ઈલ્મનું આસમાન છે બાકિર

ને ઇમામતની શાન છે બાકિર.

 

નાના, દાદા, પિતાને પુત્ર ઇમામ

અલવિયતનું નિશાન છે બાકિર.

 

કુન્નીયત એમની અબૂ જાફર,

અઝમતોનું જહાન છે બાકિર.

 

ઇલ્મ એનાથી થઈ ગયું રોશન,

ઇલ્મની આન-બાન છે બાકિર.

 

મુસ્તફા જેવી એની સીરત છે,

ને અલીના સમાન છે બાકિર.

 

ખુદ નબી એને મોકલે છે સલામ,

હક છે, હકનું વિધાન છે બાકિર.

 

મુર્તઝા છે જો આંખ અલ્લાહની,

તો એ આંખોનું ધ્યાન છે બાકિર.

 

દીનને જેણે આપ્યું નવજીવન,

આપનું ખાનદાન છે બાકિર.

 

 

શામ,કુફા છે કરબલા શાહિદ

દુઃખ ભરી દાસ્તાન છે બાકિર.

 

હશ્રમાં બક્ષજો "કલીમ"ને પણ,

આપનો મદહખ્વાન છે બાકિર.

ખાદીમહુસૈન "કલીમ" મોમિન