ઝુલ્ફિકાર

શાહે મર્દાં શેરે યઝદાં કુવ્વતે પરવરદિગાર
લાફતા ઇલ્લા અલી લા સૈફ ઇલ્લા ઝુલ્ફિકાર

ગૂંજતો બંને જહાનોમાં સદા મારો પ્રચાર
અર્શ પરથી ઊતરી છું હું અલીની ઝુલ્ફિકાર

કેટલી સદીઓની સદીઓ મેં વિતાવી અર્શ પર
હુસ્ને યૂસુફથી નિરાળું નૂર મારું બેશુમાર

જંગે ઓહદમાં અલીના હાથ પર નાઝિલ થઇ
મર્તબો કુરઆન જેવો મારો પણ છે શાનદાર

મ્યાનમાંથી નીકળી તો જીત લઈને નીકળી
જોઇને મકતલમાં મુજને મોત થાતું બેકરાર

કુફ્ર સામે જયારે જયારે પણ લડાઈ થાય છે
હમસફર રાખે છે મુજને હર ઘડી દુલદુલ સવાર

છે હવાથી પણ વધુ રફ્તાર મારા વારમાં
ખુશ થતા લાખો નબીઓ જોઇને મારો પ્રહાર

હર લડાઈમાં સદા હું સાથ હૈદરની રહી
જીત રાખી મુર્તઝાની મેં સદાયે બેકરાર

હું જ હર એક દૌરમાં સૌની મદદ કરતી રહી
આદમો, ઈસાઓ મૂસા સૌની છે બસ એક જ પુકાર

હર કદમ કુરઆન ને ઇસ્લામનું રક્ષણ કર્યું
હું ખુદાના શેરનો પામી છું એવો એતબાર

ખુશ કદી હું ખૈબરો ખંદક ને ઓહદ જીતથી
ને રહું છું કરબલાના ગમમાં હર દમ સોગવાર

છે “કલીમ” તારા જીવનનો એક સહારો યા અલી
દુઃખના ડુંગર તૂટી જાશે રાખ એનો એતબાર