આવશે જોજો

بِسْمِ اللّٰهِ الرَّحْمٰنِ الرَّحِيْمِ

મોમિનો એક દિવસ એવો આવશે જોજો,

ઇમામ ગૈબથી પરદો  ઉઠાવશે જોજો.

બતૂલની એ બકીઅ બાગમાં બદલવાને,

મજૂર એના મુહીબને બનાવશે જોજો.

મૌલા મહદી તને દેવા ને સાથ લઈ શમશીર,

જંગમાં હઝરતે અબ્બાસ આવશે જોજો.

કહાની કરબોબલાની પછી થશે અવળી, 

કુફ્રને હકની એ બયઅત કરાવશે જોજો.

સિતમનો, જુલ્મ, શહીદોનો એ બદલો લેશે,

નજાત જુલ્મથી જગને અપાવશે જોજો.

જગતને ન્યાયથી ભરપૂર એ ભરી દેશે,

ફરીથી અલવી અદાલત ચલાવશે જોજો.

એ લાફતાનો છે લખ્તે જીગર જલાલતમાં,

સિતમના સરને એ સર સર ઉડાવશે જોજો.

સિતમનું, કુફ્રનું, જુલ્મોનું જોર નહીં ચાલે,

એ આવી હકની હુકુમત ચલાવશે જોજો.

યઝીદી રાજ સૌ તારાજ થઈને રહી જાશે,

અલીનું જોમ જગતને બતાવશે જોજો.

એ આવી ગૈબથી સામ્રાજ્ય સ્થાપશે અલવી,

ફરી સલૂનીનો મિમ્બર સજાવશે જોજો.

એ આવશે તો બધાં કુફ્ર થઈ જશે બેઘર,

એ આવી કુફ્રનો ખૈબર ઉઠાવશે જોજો.

ઝહુર કરશે તો મન્સૂર થઈને આવશે એ,

મદદ કરીને બધા ગમ મિટાવશે જોજો.

તમામ આલમે ઇન્સાનિયત થશે ઇન્સાન,

જગતજનોને હક ઉપર એ લાવશે જોજો.

કહે રસૂલ અમલ શ્રેષ્ઠ એની રાહ જોવી,

મોહિબ્બો તે પછી ખુશીઓ મનાવશે જોજો.

આ કોલ મારા ઇમામે રઝાનો છે બરહક,

નિરાશા બાદ એ લોકોની , આવશે જોજો.

કે એના કામ બધા છે ભરેલ હિકમતથી,

હકીમ આવીને  દર્દો મિટાવશે જોજો.

બદરની જંગ જેટલા થશે સહચર એના,

ઇમામ એ પછી દુનિયામાં આવશે જોજો.

જગતમાં શાંતિ ને ન્યાય સલામત રહેશે,

એ આવી સત્યની સરકાર લાવશે જોજો.

ફઝાઈલ આલે મોહંમદના પઢવા એક દિવસ,

"કલીમ"ને એ ઇજન દઈ બોલાવશે જોજો.

 

 

મોમિન ખાદિમહુસૈન "કલીમ" વલેટવા.