એ તકી

નાઝ જેના હર ઘડી તકવા ઉઠાવે એ તકી,

તકવો જેના ઘ્વાર પર મસ્તક ઝુકાવે એ તકી.

જેમના વાલિદ રઝા, ને વાલિદા છે ખૈઝુરાન,

નામ જે હઝરત મોહંમદનું ધરાવે એ તકી.

જન્મતાંની સાથ જે અલ્લાહનો કલમો પઢે,

આ જગતને ખુદની જે ઓળખ કરાવે એ તકી.

બે વરસની ઉમ્રમાં ખુતબો એ આપે લોકને,

મરતબા દુનિયાને પોતાના જણાવે એ તકી.

છે લકબ જેના તકી, જવ્વાદ, આલિમ, મૂર્તઝા,

શાન પણ હર એક લકબ જેવી ધરાવે એ તકી.

પાઠ શીખવે છ વરસની ઉમ્રમાં હર ઇલ્મના,

ભલભલા આલિમને મૂંગા બનાવે એ  તકી.

નવ વરસની ઉમ્રમાં આપે જવાબો ત્રીસ હજાર,

મસઅલા ઇસ્લામના હર એક બતાવે એ તકી.

આ જગતના આલિમોથી એની શું સરખામણી,

ઇલ્મ સઘળાં ઇલ્મ પહેલાં જે ધરાવે એ તકી.

વારીસે ઇલ્મે લદુન્ની છે તો શું હેરતની વાત?

પૂછવા પેહલા જ જે ઉત્તર બતાવે એ તકી.

એ અગર જો પ્રશ્ન પૂછે સૌ મુનાઝીર ચૂપ રહે,

પૂછતાં જે ઇલ્મના દરિયા વહાવે એ તકી.

ઈબ્ને અકસમ જો કદી હજના મસાઈલ પૂછે તો,

બાળપણમાં હજના સૌ પાઠો પઢાવે એ તકી.

ઇલ્મ તારામાં હતું ક્યાં એટલું લખતો "કલીમ"

શાન ખુદ પોતાની તારાથી લખાવે એ તકી.